İrada görə gənci öldürən şəxsin məhkəməsi başlayıb

Bakı Ağır Cinayətlər Məhkəməsində qətl törətməkdə təqsirləndirilən Pərvin Çərkəzovun cinayət işi üzrə məhkəmə iclası başlayıb.

“Report”un xəbərinə görə, hakim Mirzə Xankişiyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Məhkəmənin baxış iclası yanvarın 29-a təyin edilib.

Qeyd edək ki, hadisə ötən il iyunun 24-də Binəqədi rayonu, Ağamalıyev küçəsi, 6 saylı binanın qarşısında baş verib.

Kamran Abdullayevin bud nahiyəsinə bir bıçaq xəsarəti yetirilib. O, Kliniki Tibbi Mərkəzə çatdırılanadək çoxlu qan itirdiyindən dünyasını dəyişib.

Araşdırmalar zamanı qətli daha əvvəl oğurluğa və avtomobil qaçırmağa görə məhkum olunmuş  22 yaşlı Pərvin Çərkəzovun törətdiyi məlum olub.

Qeyd edilən şəxslər daha əvvəl bir-birini tanımayıblar.

İki gənc arasında münaqişə ədəbsiz ifadələrin işlədilməsinə görə baş verib.  K.Abdullayev telefonda kiminləsə kobud danışan P.Çərkəzovun yanından keçəndə ona narazılığını bildirib. O, P.Çərkəzovu əxlaqlı olmağa çağırıb. P.Çərkəzov isə iraddan sonra cibindən bıçaq çıxararaq K.Abdullayevə zərbə endirib.

Daha sonra P.Çərkəzov hadisə yerindən qaçıb. O,  tutularaq istintaqa cəlb edilib.

İstintaq orqanı tərəfindən P.Çərkəzovun barəsində Cinayət Məcəlləsinin 120.2.2-ci (xuliqanlıq niyyəti ilə adam öldürmə) maddəsi ilə ittiham elan edilib.

Şərh yaz

Şərh yaz

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir