Məhkəmə cərimələnən şirkət barədə qərarı elan edib

 Məhkəmə cərimələnən şirkət barədə qərarı elan edib

Bakı Apelyasiya Məhkəməsində “Xəzər İnşaat-XXI əsr” MTK barəsində olan məhkəmə qərarından verilən apelyasiya şikayətinə baxılıb.

Hakim Rəşad Abdulovun sədrliyi ilə keçirilən prosesdə qərar elan olunub.

Qərara əsasən, MTK-nın apelyasiya şikayəti təmin edilməyib, qərar dəyişdirilmədən saxlanılıb.

Qeyd edək ki, Azərbaycan Maliyyə Bazarlarına Nəzarət Palatası “Xəzər İnşaat-XXI əsr” MTK barəsində inzibati xəta haqqında protokol tərtib edib, baxılması üçün Suraxanı Rayon Məhkəməsinə göndərib.

Məhkəmə şirkəti İnzibati Xətalar Məcəlləsinin 430.4-cü (avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir) maddəsi ilə təqsirli bilinərək, 2373 ABŞ dolları məbləğində cərimələnməsi haqda qərar çıxarıb.

Qərardan narazı qalan şirkət apelyasiya şikayəti verib.

Xatırladaq ki, 2012-ci ildən fəaliyyət göstərən “Xəzər İnşaat-XXI əsr” MTK Bakının müxtəlif hissələrində hündürmərtəbəli binaların tikintisini həyata keçirir.

Şərh yaz

Şərh yaz

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir