Moskva Səhiyyə Departamenti “COVİD-19” testlərinin dəqiqlik dərəcəsinin aşağı olduğunu etiraf edib. Departament bu barədə Moskvanın tibb müəssisələrinə yazılı xəbərdarlıq göndərib. Moskvanın baş həkiminin imzaladığı məktubda testlərin etibarsızlığı qeyd olunub. Eyni zamanda vəziyyətinin ağırlaşa biləcəyi düşünülən pnevmoniyalı xəstələrin kompüter tomoqrafiyasına göndərilməsi tövsiyə edilib.
Moskva xəstəxanalarında toplanan təcrübəyə görə, “COVİD-19” testinin cavabı neqativ alınan elə xəstələr olub ki, səhhətləri bir neçə saat sonra pisləşib. Kompüter tomoqrafiyası (KT) həmən şəxslərdə artıq ağciyərlərin sıradan çıxdığını göstərib.
Bu səbəbdən Moskva Səhiyyə Departamenti “COVİD-19″un yeganə etibarlı diaqnostika metodunun KT və rentgenoqrafiyanın olduğunu bildirib.
Rusiyanın Səhiyyə Nazirliyinin ştatdankənar baş pulmonoloqu Sergey Avdeyev də polimeraza zəncirvari reaksiya (PZR) diaqnostika metodunun (testinin) dəqiqlik dərəcəsinin 70-80 faiz olduğunu bu həftə keçirilmiş “İnsan və dərman” konfransında bildirib. O, 1400 xəstədən 300-nün yeni növ koronavirus – SARS-CoV-2 (COVİD-19) testinin neqativ çıxdığını, lakin onların ağciyərlərində dəyişikliyin KT üsulu ilə aşkarlandığını qeyd edib.
Xatırladaq ki, polimeraza zəncirvari reaksiya ən yeni və dəqiq diaqnoz metodlarından biridir. Yaradıcısı – Carey Mullisə 1993-cü ildə Nobel mükafatı verilib.
Bu metod eksperimental sayılsa da, səhiyyədə, o cümlədən SARS-CoV-2 (koronavirusun) diaqnostikasında geniş istifadə olunur.
