İşğaldan azad olunmuş Azərbaycan ərazilərində erməni hərbçilərinin meyitlərinin axtarışı davam edir.
Ermənistan mənbələrinin xəbərinə görə, bu gün daha 10 erməni cəsədi aşkar olunub. Yəqin ki bu gün açıqlansa da, əslində statistika ötən sutkaya aiddir. Eyni zamanda mənbə məlumatı Dağlıq Qarabağda hələ də “fəaliyyət” göstərən qondarma və qanunsuz quruma istinadən yazır:
Füzulidən 5, Hadrutdan 4, Martunidən 1 cəsəd çıxarılıb. Hadrut və Füzulidə axtarışlar davam edir”
Beləliklə, tamamilə Azərbaycanın nəzarətindəki işğaldan azad olunmuş ərazilərdən bu günədək 1155 erməni hərbçisinin meyiti tapılaraq çıxarılıb. Xəbəri isə mütəmadi olara qondarma və qanunsuz rejimin təmsilçisi verir.
Onu da qeyd edək ki, gündəlik statistika və nəticələr bu rəqəmin böyüyəcəyi ehtimalını gücləndirir. Deməli, bu proses belə də davam edəcək.
Mənbə: news.am
REDAKSİYADAN:
Qeyd edək ki, axtarış-xilasetmə əməliyyatı Beynəlxalq Qırmızı Xaç təşkilatının, Rusiya sülhməramlılarının, eləcə də itkin düşmüş erməni hərbçilərinin yaxınlarının iştirakı ilə aparılır. Şübhəsiz, əməliyyatlar Azərbaycanın müvafiq orqanlarının nümayəndələrinin nəzarəti altında keçirilir.
Bir başqa sözlə, Azərbaycan dövlətinin humanist məramı sayəsində bu axtarış-xilasetmə əməliyyatlarına düşmən tərəf – ermənilər də qoşulub: müharibə dayandırıldıqdan sonra itkin elan etdikləri hərbi qulluqçularının qalıqlarını onların qohumları gəlib bizim ərazidə axtarırlar.
Əlaqədar:
Azərbaycanda 1133 düşmən cəsədi aşkar olunub – ermənilər yenə də nanəciblik edir
Buna görə ermənilər dünyada hər kəsə minnətdarlıq ifadə ediblər, təkcə azərbaycanlılardan başqa: bir dəfə də olsun Azərbaycan dövlətinə və xalqına bu xoş məramına görə etiket təşəkkürünü belə dillərinə gətirməyiblər.
Üstəlik Azərbaycanın bu humanitar siyasəti fonunda yenə də öz mənfur əməllərindən əl çəkmirlər: bu axtarış-xilasetmə əməliyyatı ilə bağlı məlumat verməyi Dağlıq Qarabağdakı separat, qondarma, qanunsuz rejim mənsubu özünə vəzifə edib.
Azərbaycan heç bir zaman bu qondarma və qanunsuz rejimi tanımayıb, tərəf müqabili, münaqişə-danışıq subyekti kimi qəbul etməyib. Bu xüsusda istənilən təklifi də qətiyyətlə rədd edib.
Müharibə torpaqlarımızın azad olunması, dövlətin ərazi bütövlüyünün və Dağlıq Qarabağ üzərində suveren hüquqlarının bərpası uğrunda aparılıb. Nəticə etibarilə də parlaq Qələbə qazanılıb.
Hazırda ərazi bütövlüyünün əsas göstəricisi – dövlət sərhədlərinin bərpası prosesi gedir. Bu, olduqca mühüm, ciddi və tarixi hadisədir.
Düşünmək olar ki, Azərbaycanın Ermənistanla dövlət sərhədinin beynəlxalq hüquq və sənədlər (xəritələr) əsasında bərpasından, yeni mövqelərin tutulub möhkəmləndirilməsindən, təhlükəsizliyinin təminindən sonra daxildə – Dağlıq Qarabağda da ölkə qanunları ilə “səliqə-səhman” yaradılacaq…
Bununla belə, Rusiya sülhməramlılarının statuslarını aşan “özfəaliyyət”i fonunda müəyyən ictimai gərginlik, narahatlıq var və bu, heç də əsassız deyil. Hələ də cavabsız qalan qalaq-qalaq sual mötəbər münasibət gözləyir.
İctimai gərginliyə səbəb olan bir əsas amil də cəmiyyətin aktual mövzular üzrə informasiya “aclığı” keçirməsidir.
Müharibə sona çatandan sonra hökumət orqanları Azərbaycan cəmiyyətini ehtiyac duyulan informasiya ilə yetərincə təmin etmir. Eyni zamanda, bəzi hadisələrə operativ münasibət bildirilmir.
Cəmiyyəti narahat edən suallar çoxdur.
Məsələn,
- Dövlət sərhədlərinin bərpası prosesi necə gedir?
- Niyə bu barədə Dövlət Sərhəd Xidməti məlumat açıqlamır, operativ fəaliyyət göstərmir?
(Qeyd: Dövlət Sərhəd Xidmətinin rəsmi saytında ümumiyyətlə bu mövzuda informasiya yoxdur)
- Müdafiə Nazirliyi və ya Fövqəladə Hallar Nazirliyi niyə erməni hərbçilərinin qalıqlarının axtarışı əməliyyatı barədə mütəmadi və operativ məlumat vermir – təşəbbüsü əlində saxlamır?
- Niyə Azərbaycan ərazilərində aparılan beynəlxalq axtarış-xilasetmə əməliyyatı barədə məlumatı mütəmadi olaraq Dağlıq Qarabağdakı qondarma qurumun dilindən almalıyıq?
- Niyə Azərbaycan cəmiyyəti Ermənistanla sərhəddə, məsələn, Zəngəzurda və ya Qarabağda baş verən hadisələr haqqında informasiyanı erməni-rus mənbələrindən almalı, onların ideoloji təsiri altına düşməlidir?
Qeyd: Biz məxsusi olaraq Dağlıq Qarabağdakı vəziyyətlə bağlı təkcə bizi deyil, bəlkə də dünyanı maraqlandıran önəmli sualları səsləndirmədik. Onlar aktual olsa da, sərhədlərin demarkasiyası və delimitasiyası mərhələsində məhz bu prosesə aid suala toxunduq.
Müharibənin aktiv fazası – hərbi əməliyyatlar dayanıb, amma ideoloji informasiya savaşı hələ də davam edir.
Deyilə bilər ki, Müdafiə Nazirliyinin və ya Sərhəd Xidmətinin, yaxud digər əlaqədar orqanın başı çox qarışıqdır, işləri çoxdur.
Bəli, doğrudur. Zatən, informasiya ehtiyacı da bu işlərlə bağlı yaranıb. Hər qurumun da konkret olaraq bu ehtiyacı ödəməli olan mətbuat xidmətləri var.
Bəs onların başı nəyə qarışıqdır? Yoxsa, onlar da sərhəd çəkir, ermənilərlə çəkişir, erməni meyiti axtarır, yol, kommunikasiya qurur? Onların işi məhz ölkəni zəruri və tələb olunan informasiya ilə təmin etmək deyilmi?!.
Özü də, təkcə KİV-in deyil, hər bir Azərbaycan vətəndaşının informasiya əldə etmək hüququ var: maddə 2.2
Qeyd edək ki, analoji məsələ ilə bağlı Müdafiə Nazirliyinə e-mail müraciətimizə hələ də cavab verilməyib.
Əslində, hökumət qurumlarının mətbuat xidmətlərinin fəaliyyəti ilə bağlı problemlər daha geniş və əhatəlidir, təkcə qeyd olunan orqanlarla bağlı deyil.
Maraqlıdır, Azərbaycan Mətbuat Şurası bu xüsusda nə düşünür – cəmiyyətin hazırkı həssas tarixi dövründə aktual mövzularda rəsmi və mötəbər informasiyaya ehtiyacını KİV necə ödəməlidir?
Azərbaycan cəmiyyətinin və mətbuatının bəzi mövzular üzrə erməni mənbələrinə üz tutmaması üçün nə edilməldir?
Nəhayət, əlaqədar mətbuat xidmətlərini çevik fəaliyyətə və əməkdaşlığa necə cəlb etmək olar?
