Beynəlxalq Kosmik Stansiyanın (BKS) ekipajı köhnə akkumulyatorlardan ibarət lazımsız platformanı kosmosa atıb. Kosmosa atılan növbəti “zibilin” çəkisi 2,5 ton olub. Bu, BKS tarixində kosmosa atılmış ən böyük və ağır tullantıdır.
Platforma stansiyadan yapon istehsalı olan manipulyator vasitəsilə kənarlaşdırılıb. Bu qurğu stansiyaya ötən ilin mayında HTV-9 kosmik yük gəmisində qaldırılıb. Köhnə akkumulyatorlar ABŞ istehsalı olan yeniləri ilə əvəzlənib.
Platformanın BKS-dan kənarlaşdırma prosesini NASA canlı yayımlayıb. Mütəxəssislərin bildirdiyinə görə, atılan yük bir müddət sonra orbitdən çıxacaq və Yer çəkimi ilə atmosferin sıx qatlarına girərək yanacaq.
Hazırda BKS-da iki rusiyalı, 4 amerikalı, 1 yapon astronavt fəaliyyət göstərir.
Heyət iki gün əvvəl Rusiyanın “Zvezda” modulunu təmir edib – ondakı çatı germetik maddə ilə bağlayıblar.
Mənbə: Rambler