Türkiyə ilə aviasiya əlaqəsinin məhdudlaşması nəticəsində Rusiya turizm operatorları azı 5 milyard rubl (120 milyon manatdan çox) vəsait itiriblər.
Bu barədə jurnalistlərə Rusiya Turizm Sənayesi İttifaqının vitse-prezidenti Yuri Barzıkin məlumat verib. O əlavə edib ki, hələ İstanbuldan keçərək digər ölkələrə uçan tranzit sərnişinlərlə bağlı rəqəmlər bu statistikaya daxil deyil.
Y.Barzıkin ümidvar olduğunu bildirib ki, bu itkiləri iyunun 1-dən aviauçuşların bərpasından sonra kompensasiya etmək mümkün olacaq.
Xatırladaq ki, Rusiya ilə Türkiyə arasında aviasiya əlaqəsi epidemioloji vəziyyətlə bağlı aprelin 15-dən iyunun 1-dək məhdudlaşdırılıb.
Mənbə: AZƏRTAC
