Bu gün Bolqarıstanın paytaxtı Sofiyada güləş üzrə Dünya Olimpiya Təsnifat Turnirinə start verilib.
“Report”un məlumatına görə, ilk yarış günündə sərbəst güləşçilər yarışıa qoşulub.
Azərbaycanın 3 təmsilçisi güləşin bu növündə qüvvəsini sınayır.
- 57 kq çəki dərəcəsində mübarizə aparan Georgi Edişeraşvili təsnifatda Otari Qoqavanı (Gürcüstan), ardınca isə Məhəmməd Bilalı (Pakistan) məğlub edib. O, 1/4 finalda Məhəmməd İkromova (Tacikistan) qalib gələrək yarımfinala yüksəlib.
- 86 kq-da yarışan Abubakr Abakarov Uri Kalaşnikov (İsrail) və Sandro Aminaşvilidən (Gürcüstan) güclü olub. Güləşçi 1/4 finalda Azamat Dauletbekov (Qazaxıstan) üzərində əzmkar qələbə qazanaraq yarımfinala adlayıb.
- 120 kq-dakı Vahid Qalayev Xose Kuba Vaskesə (İspaniya) tam üstünlüklə qalib gəlsə də, 1/4 final mərhələsində Xose Daniel Robertti (Venesuela) ilə dueldən məğlub ayrılıb və lisenziya şansını itirib.
Qeyd edək ki, lisenziya sahiblərini müəyyənləşdirən yarımfinal qarşılaşmaları saat 20:00-da start götürəcək.
Sərbəst güləşdə 65, 74 və 97 kq-da olimpiadaya vəsiqə təmin edilib. Şərif Şərifov (97 kq) sonuncu dünya çempionatında, Hacı Əliyev (65 kq) və Hacımurad Hacıyev (74 kq) isə Avropa Olimpiya Təsnifat turnirində bu vəzifənin öhdəsindən gəlib.
