Ter-Petrosyan: “Erməni xalqını yenə də  itkilər və məyusluq gözləyir”

Ermənistanın keçmiş (birinci) prezidenti Levon Ter-Petrosyan ölkəsindəki siyasi-ictimai vəziyyətlə bağlı bəyanat verib. O, müharibədən sonra Ermənistanda hökm sürən siyasi ritorikanın yeni itkilərə və məyusluqlara səbəb olacağını vurğulayıb.

Ter-Petrosyan 44 günlük müharibəyə görə təkcə Baş nazir Nikol Paşinyanın məsuliyyət daşımadığını bildirib. Eks-prezident məğlubiyyətə görə Paşinyanın sələflərini ittiham edib. O, əsas niyyətləri  Paşinyanı devirmək olan “Vətənin xilası hərakatı”nı yaradan qüvvələri nəzərdə tutduğunu söyləməklə konkret ünvan da göstərib.

Ter-Petrosyan “iLur.am”  saytında dərc olunmuş bəyanatında qeyd edib ki, Paşinyanın opponentləri onu məğlubiyyətdə günahlandırırlar, amma  həqiqəti yarımçıq söyləyirlər: “müxalifət  etiraf etmək istəmir ki, Paşinyan onların yardıqları, törəməsidir”

O, özündən sonrakı dövrlərdə – 1997-ci ildən etibarən bütün siyasi qüvvələrin ardıcıl olaraq Qarabağ probleminin Ermənistan üçün məqbul şərtlərdə və uğurlu həlli təşəbbüslərini pozduğunu deyib və əlavə edib:

Bu qüvvələr Qarabağda status-kvonun saxlanılması və hər hansı kompromis variantdan imtina siyasəti yürüdüblər. Nəticədə ölkəni bu gün yalnız Paşinyanı günahlandırdıqları   fəlakətə gətirib çıxarıblar.

Xalqın və ordunun şəninə tərif söyləyən Ter-Petrosyan  “hakimiyyətlərin cinayətkar siyasəti nəticəsində ordu  şəxsi heyətin  sayına və müasir silahlarına görə dəfələrlə onu üstələyən rəqiblə savaşmağa məcbur qalıb” deyib.

O təəssüflə qeyd edib ki, Ermənistan və diaspora məğlubiyyətdən heç bir  nəticə çıxarmayıb.  Eks-prezident Ermənistanda müharibədən sonrakı ritorikanın yenə də boş, xarici dünyadan mənasız  gözləmədən ibarət olduğunu vurğulayıb. Ter-Petrosyan  Türkiyə və Azərbaycana qarşı təhdidlərin  və hərbi revanşizm ritorikasının təhlükəsindən də bəhs edib. O, bu siyasi tendensiyanın seçkiqabağı daha da artacağına əminliyini ifadə edərək deyib:

Belə şəraitdə vəziyyətin sağlamlaşacağına ümid bəsləmək mümkün deyil.  Bu isə o deməkdir ki, erməni xalqını yenə də  itkilər və məyusluq gözləyir.

Qeyd:  Xatırladaq ki,  Ermənistanda iyunun 20-də keçiriləcək növbədənkənar parlament  seçkilərində Levon Ter-Petrosyanın rəhbərlik etdiyi Erməni Milli Konqresi də iştirak edəcək.

 

Mənbə

Bir cavab yazın

Sizin e-poçt ünvanınız dərc edilməyəcəkdir.